www.mni.is

Aðalfundur MNÍ 2010

Fri, 28 May 2010 13:03:00 GMT

Dags: 10. maí 2010, kl. 20:00

Staður: Grand Hótel, Svítan 13. hæð

Fundarstjóri: Jónína Stefánsdóttir

Mættir: 16 félagsmenn

Ritari: Margrét Bragadóttir

Fundurinn hófst á því skipaðir voru fundarstjóri og fundarritari. Síðan var gengið til dagskrár.

Dagskrá fundarins var eftirfarandi:

1. Skýrsla stjórnar fyrir starfsárið 2009-2010

Formaður kynnti skýrslu stjórnar. Sjá í fylgiskjali.

2. Reikningar félagsins

Sigríður Ásta Guðjónsdóttir, gjaldkeri kynnti reikninga félagsins. Á síðasta ári voru afskrifaðar útistandandi skuldir vegna vangoldinna félagsgjalda. Reikningar voru samþykktir samhljóða.

3. Starfsáætlun, fjárhagsáætlun næsta starfsárs og ákvörðun félagsgjalda.

Formaður kynnti tillögur stjórnar að starfsáætlun. Sjá í fylgiskjali.

Stjórnin lagði til að óbreytt félagsgjöld; 4000 kr. Helstu útgjöld eru vegna Matvæladagsins og gera má ráð fyrir að samdráttur verði í styrkveitingum. Tillaga stjórnar er að formanni og umsjónarmanni heimasíðu verði áfram greiddar 30.000 krónur á mánuði, í 9 mánuði á ári sem verktakagreiðslur. Félagið styrkir námskeið í samvinnu við Endurmenntun HÍ að hámarki 10 þ. Kr. á ári.

5. Skýrslur nefnda.

Eftirfarandi nefndir gáfu skýrslu:

Matvælahópur sem í sitja: Baldvin Valgarðsson, Ólöf Hafsteinsdóttir og Ragnheiður Héðinsdóttir. Helstu mál hópsins voru námskeið í samstarfi við Endurmenntun og fyrirtækjaheimsóknir, sem hvortveggja hafa verið vel sótt.

Næringarhópur sem í sitja: Óla Kallý Magnúsdóttir og Ragnheiður Guðjónsdóttir. Fulltrúum í forsvari í hópnum var fjölgað um tvo. Um 30-40 eru á póstlista hópsins. Helstu mál voru niðurgreiðslur á þjónustu næringarráðgjafa. Tryggingarstofnun hafnaði þátttöku vegna kostnaðar við næringarráðgjöf, en hinsvegar samþykkti Bandalag háskólamanna (BHM) slíka þátttöku. Það hefur verið kynnt öðrum stéttarfélögum og regnhlífasamtökum þeirra.

Næringarrekstrarhópur sem í sitja: Elín Einarsdóttir, Guðný Jónsdóttir og Olga Gunnarsdóttir. Einn fundur var haldinn á árinu. Einnig var hérlendis haldinn lokafundur í Norrænni stjórn næringarrekstarfræðinga, en sá félagsskapur verður lagður niður.

6. Kjör til stjórnar.

Í stjórn sitja áfram til eins árs:

a) Herdís Guðjónsdóttir, formaður.

b) Ragnheiður Guðjónsdóttir.

c) Helen Williamsdóttir Gray.

Eftirfarandi stjórnarmenn gáfu kost á sér til áframhaldandi stjórnarsetu í tvö ár:

a) Guðný Jónsdóttir.

b) Sigríður Ásta Guðjónsdóttir

Varamenn voru kosnir til eins árs:

a) Rósa Jónsdóttir (endurkosin).

b) Borghildur Sigurbergsdóttir.

7. Kjör tveggja endurskoðenda og eins til vara..

Skoðunarmenn reikninga voru kosnir:

Svava Líf Edgardsdóttir

Pétur Helgason var endurkosinn.

Edda Magnúsdóttir, varamaður.

8. Önnur mál

a) Menntamál

Margir tóku til máls vegna ástandsins í menntamálum í okkar fagi. Næringarrekstrarfræði er ekki kennd hérlendis. Enginn er skráður í grunnnámi í matvælafræði, þó svo nokkur hópur sé í framhaldsnámi við matvælafræði. Annað nám í matvælageiranum á líka undir högg að sækja, þar sem Fiskvinnsluskólinn var lagður niður fyrir nokkrum árum og afar fáir stunda iðnnám í matvælagreinum.

Matvælatæknifræði sem Matís ætlaði að koma á fót hefur ekki gengið eftir.

Það jákvæða er að næringarfræðin við HÍ mjög vinsæl og þar þarf að beita fjöldatakmörkunum. Enn fremur hefur næringarfræði verið tekin inn í aðalnámsskrá grunnskóla, sem hluti af líffræðinámi. Jafnframt er mikilvægt að styðja við heimilisfræðikennslu í grunnskólum.

Rætt var um áhrif þess að matvælafræði ásamt næringarfæði var sett undir Heilbrigðisvísindasvið HÍ og töldu fundarmenn það hafa slæm áhrif á matvælafræði sem væri í eðli sínu raungreinafag. Lagt var til að stjórn MNÍ sæi um næstu skref sem stefndu að því að gera okkur sýnileg sem fagfélag og styðja við menntun á okkar sviði.

b) Heimasíða MNÍ

Tillaga kom um að gerð væri starfslýsing fyrir umsjónaraðila heimasíðu MNÍ.

c) Óskað var eftir að faghópar væru í meiri tengslum við stjórn MNÍ.

Engin önnur mál voru tekin fyrir.

Fundi slitið.

Stjórnarfundur MNÍ 18. febrúar 2010

Wed, 10 Mar 2010 08:42:00 GMT

Stjórnarfundur MNÍ
Dags.: 18. febrúar 2010
Staðsetning: Gló, Engjateig, Reykjavík.
Fundarefni:
1. Samþykkt síðustu fundargerðar
2. Matvæladagur
3. Nefndir
4. Skiladagur nefnda
5. Endurmenntun
6. Vísindaferðir
7. Önnur mál
8. Næsti fundur

Viðstaddir eru: Herdís M. Guðjónsdóttir formaður, Sigríður Ásta Guðjónsdóttir gjaldkeri, Ragnheiður Guðjónsdóttir ritari, Guðný Jónsdóttir og Helen Grey.

Efni:

1. Samþykkt síðustu fundargerðar
Fundargerð samþykkt

2. Matvæladagur
Búið er að bóka sal fyrir Matvæladaginn á Grand Hótel 21. október 2010.
Margar tillögur bárust að efna matvæladagsins 2010 og var farið yfir þær á fundinum. Flestar eru af sama meiði þar sem rætt er um heilsu, næringu, vísindalega þekkingu, markaðsöfl, misvísandi upplýsingar í fjölmiðlum og fleira. Stjórn samþykk því að fjallað verði um tengsl á milli þessara þátta. Ragnheiður tekur saman tillögurnar og spurningarnar sem komu fram í þeim sem stjórn getur síðan kastað á milli sín.

3. Nefndir
Ekki komið á hreint hvort/hverjir vilja halda áfram nefndarstörfum í fjöreggsnefnd, ritnefnd og framkvæmdanefnd Matvæladagsins. Stjórn telur æskilegt er að einhverjir starfi áfram til að þekkingin um framkvæmd tapist ekki niður milli ára. Þarf að auglýsa eftir fólki til að taka þátt í nefndarstörfum fyrir Matvæladaginn og mun formaður senda tölvupóst til félagsmann þess efnis.

4. Skiladagur nefnda
Skiladagur nefnda þ.e. fjöreggsnefnd, ritnefnd og framkvæmdanefnd ákveðinn 1. mars. Sigríður heldur áfram að athuga með stað.

5. Endurmenntun
Fyrsta námskeiðið í samstarfi MNÍ og Endurmenntunnar HÍ var haldið 4. febrúar og tókst vel til.

6. Vísindaferðir
Farið verður í fyrstu vísindaferð ársins að skoða ný húsakynni Matís 19. febrúar eins og auglýst hefur verið í tölvupósti.

7. Önnur mál
Rætt um að sendur verði út upplýsingapóstur um það sem er á döfunni og t.d. bent á fundargerðir stjórnar.

Rætt um hvort Matvæladagurinn verði með meiru ráðstefnusniði og veggspjöld verði sýnd. Stjórn líst vel á þá hugmynd.

8. Næsti fundur
Verður ákveðinn í tölvupósti síðar.

Stjórnarfundur MNÍ 27. janúar 2010

Wed, 10 Feb 2010 14:44:00 GMT

Stjórnarfundur MNÍ
Dags.: 27. janúar 2010
Staðsetning: Heiðargerði 4, Reykjavík.

Fundarefni:
1. Samþykkt síðustu fundargerðar
2. Matvæladagur
3. Nefndir
4. Skiladagur nefnda
5. Félagsskráin
6. Tillaga Guðbrandar frá Matvæladegi um ókeypis ráðgjöf MNÍ félaga.
7. Vefsíðan
8. Endurmenntun
9. Vísindaferðir
10. Vinna úr tillögum frá hugarflugsfundi MNÍ
11. Önnur mál
12. Næsti fundur

Viðstaddir eru: Herdís M. Guðjónsdóttir formaður, Sigríður Ásta Guðjónsdóttir gjaldkeri,Ragnheiður Guðjónsdóttir ritari, Guðný Jónsdóttir og Helen Grey.

Efni:

1. Samþykkt síðustu fundargerðar
Fundargerð samþykkt

2. Matvæladagur
Formaður tekur að sér að auglýsa eftir tillögum að efni sem tekið verður fyrir á næsta matvæladegi í tölvupósti. Stjórnarmeðlimir ætla að hvetja félaga til að senda inn tillögur að efni. Helen tekur að sér að athuga með sal á Grand Hótel fyrir næsta matvæladag. Stjórn valdi 4 dagsetningar og raðaði niður til að auðvelda bókun á sal.

3. Nefndir
Haft verður samband við fjöreggsnefnd, ritnefnd og framkvæmdanefnd Matvæladagsins og athugað hvort þær séu tilbúnar að starfa áfram. Æskilegt er að einhverjir starfi áfram til að þekkingin um framkvæmd tapist ekki niður milli ára. Tekið fyrir á næsta fundi hverjir eru tilbúnir að halda áfram nefndarstörfum.

4. Skiladagur nefnda
Skiladagur nefnda þ.e. fjöreggsnefnd, ritnefnd og framkvæmdanefnd ákveðinn 25. febrúar. Síðar breytt í tölvupóstsamskipum milli stjórnarmeðlima í 18. febrúar 2010.

5. Félagsskráin
Enn er unnið að endurbótum á félagaskrá en sú vinna er aðallega í höndum formanns og gjaldkera. Stjórnarmeðlimir fóru yfir listann og bættu inn netföngum þar sem þekking á þeim var til staðar. Haldið verður áfram með þessa vinnu og síðan er stefnan að setja endurbætta félagaskrá á heimasíðu MNÍ.

6. Tillaga Guðbrandar frá Matvæladegi um ókeypis ráðgjöf MNÍ félaga.
Guðbrandur Sigurðsson, framkvæmdastjóri Nýlands kom því á framfæri við fundargesti að MNÍ félagar kæmu fyrirtækjum til hjálpar með ókeypis ráðgjöf. Haft verður samband við hann og leitað eftir frekari útfærslu.

7. Vefsíðan
Vefsíða MNÍ rædd og hugmyndir að endurbótum til að auka umferð um síðuna. Einnig talað um að koma upp teljara á síðuna til að hægt sé að fylgjast með heimsóknum. Sett fram hugmynd um að formaður sendi út tölvupóst öðru hvoru til að minna á atburði úr atburðadagatalinu.

8. Endurmenntun
Rætt um gang í samstarfi MNÍ og Endurmenntunnar HÍ. Fyrsta námskeið í samstarfi MNÍ og EHÍ verður í 4. febrúar. Samstarfsnefndin hittist í næstu viku til að ákveða framhaldið. Athugaðir verða möguleikar til að senda út aðra könnun í vor til að athuga reynslu félagsmanna á þjónustunni sem og fyrir hvaða námskeiðum áhugi er mestur.

9. Vísindaferðir
Skemmtinefnd hefur sett niður dagsetningar fyrir 2 vísindaferðir í vor þ.e. til Ölgerðarinnar annars vegar og Matís hinsvegar. Dagsetningar verða auglýstar í tölvupósti og á vefsíðu MNÍ. Stjórn setur fram þá hugmynd um vorferð um Vesturland í samstarfi við Beint frá býli. Formaður kemur þeirri hugmynd á framfæri við skemmtinefnd.

10. Vinna úr tillögum frá hugarflugsfundi MNÍ
Farið var í gegnum tillögur frá hugarflugsfundi MNÍ. Ákveðið að ræða við matvælahóp um útfærslu á tillögunum.

11. Önnur mál
Samstarf næringarrekstrarfræðinga á Norðurlöndum
Félag næringarrekstrarfræðinga hefur verið í norrænu samstarfi. Árlega hafa stjórnir næringarrekstrarfræðinga hist og fundað um málefni líðandi stundar. Í ár er fundurinn haldinn á Íslandi dagana 11-12 júní.

Niðurgreiðsla næringarráðgjafar frá stéttarfélögunum
Útbúið verður bréf til að senda stéttarfélögum. Ragnheiður tekur það að sér og verður það sent á milli stjórnarmeðlima til yfirlestrar.
Hugmynd kom fram að athuga hvort að Vinnumálastofnum niðurgreiddi ráðgjöf til atvinnulausra.

Félagsgjöld
Félagsgjöld verða send út í vor. Greiðsluseðlar verða sendir félagsmönnum og kom fram hugmynd að senda með bréf frá formanni eða stjórn til að minna á starfsemi félagsins.

Jólagjafir
Hefð hefur verið fyrir því að færa nefndum þ.e. framkvæmdanefnd Matvæladagsins, fjöreggsnefnd og ritnefnd jólagjöf sem þakklætisvott fyrir vel unnin störf en það var ekki gert fyrir síðustu jól. Ákveðið að nefndarfólk fengi góugjöf í staðinn sem yrði afhent á skiladegi nefnda.

Greinar í Fréttablaðið
Athuga þarf hvort að þessi farvegur sé ennþá opin. Haft verður samband við Ragnheiði Héðinsdóttur til að athuga það. Vonast er til að svo sé, þá er hægt að hvetja félaga MNÍ til að semja og senda inn stuttar greinar.

12. Næsti fundur
Næsti fundur verður haldinn 18. febrúar 2010.

Stjórnarfundur MNÍ

Mon, 19 Oct 2009 16:59:00 GMT

Stjórnarfundur MNÍ
Dags.: 12. október 2009
Staðsetning: MAST- Stórhöfða 23.

Fundarefni:
1. Samþykkt síðustu fundargerðar

2. Samþykkt nýrra félaga

3. Matvæladagur

4. MNÍ síðan

5. Samstarf Endurmenntunnar HÍ og MNÍ

6. Önnur mál

Viðstaddir eru: Herdís M. Guðjónsdóttir formaður, Sigríður Ásta Guðjónsdóttir gjaldkeri og Ragnheiður Guðjónsdóttir ritari.

Efni:

1. Samþykkt síðustu fundargerðar

Fundargerð samþykkt

2. Samþykkt nýrra félaga

Umsókn Helgu Margrétar Pálsdóttur, matvælafræðings um inngöngu í félagið var samþykkt.

3. Matvæladagur

Undirbúningur matvæladags gengur vel. Hann verður haldinn 15. október 2009 á Grand Hótel, Engjateigi, Reykjavík. Formaður er í góðum samskiptum við nefndina og aðstoðar hana með samskipti við fjölmiðla. Borist hefur vilyrði um styrk að upphæð 100.000 krónur frá Útflutningsráði sem kemur þá til viðbótar við styrk frá Sjávarútvegs- og landbúnaðarráðuneyti sem hefur nú þegar borist.
Matur- blaði Matvæladags MNÍ verður dreift með Morgunblaðinu á miðvikudaginn 14. október.

4. MNÍ síðan

Unnið er að uppfærslu heimasíðu MNÍ og verður ný og endurbætt síða MNÍ opnuð á Matvæladaginn 15. október 2009.

5. Samstarf Endurmenntunnar HÍ og MNÍ

Unnið hefur verið úr skoðanakönnun sem send var félagsmönnum í tölvupósti og settar fram tillögur að kúrsum. Skipuð hefur verið samstarfsnefnd með fulltrúum beggja aðila. Baldvin Valgarðsson, Guðrún Kristín Sigurgeirsdóttir og Guðný Jónsdóttir sitja í henni fyrir hönd MNÍ ásamt tveimur fulltrúum Endurmenntunar HÍ.

6. Önnur mál

Stéttarfélagið BHM samþykkti í sumar að næringarráðgjöf væri niðurgreidd af styrktar- og sjúkrasjóði félagsins eftir ábendingu frá félaginu. Í framhaldinu þarf að senda samskonar bréf til annarra stéttarfélaga. Það verður tekið fyrir á næsta stjórnarfundi.

Formaður heldur áfram uppfærslu póstlista félagsins og er stefnan að láta listann liggja frammi á Matvæladaginn til að félagsmenn geti yfirfarið upplýsingarnar á honum. Í framhaldinu verður hann settur inn á vef félagsins.

Stjórnarfundur MNÍ

Mon, 19 Oct 2009 16:53:00 GMT

Stjórnarfundur MNÍ
Dags.: 15. september 2009
Staðsetning: Hjúkrunarheimilið Sóltún, Sóltúni.

Fundarefni:
1. Samþykkt síðustu fundargerðar

2. Matvæladagur

3. MNÍ síðan

4. Sýni v.s. Endurmenntun

5. Önnur mál
6. Næsti fundur
Viðstaddir eru: Herdís M. Guðjónsdóttir formaður
Sigríður Ásta Guðjónsdóttir gjaldkeri, Ragnheiður Guðjónsdóttir ritari og Guðný Jónsdóttir. Helen Grey tilkynnti forföll vegna veikinda.

Efni:

1. Samþykkt síðustu fundargerðar

Fundargerð samþykkt

2. Matvæladagur

Undirbúningur matvæladags gengur vel. Hann verður haldinn 15. október 2009 á Grand Hótel, Engjateigi, Reykjavík. Tveir fyrirlesarar eru utan MNÍ og var samþykkt að greiða þeim 30.000. krónur fyrir fyrirlesturinn. Borist hefur vilyrði um styrk að upphæð 100.000 krónur frá Sjávarútvegs- og landbúnaðarráðuneyti.

3. MNÍ síðan

Borist hefur erindi frá vefstjóra um að lagt verði í endurbætur á heimasíðu MNÍ og einnig að breytt verði um staðsetningu hýsingar en nú er vefurinn hýstur hjá Símanum. D10, fyrirtækið sem hefur séð um vefinn, hefur metið að það endurbætur kosti um 50 þúsund. Ekki voru upplýsingar til staðar um verð hýsingar. Þarf að fá ýtarlegri kostnaðaráætlun svo hægt sé að meta hagkvæmari kostinn. Hugmyndir um að gera atburðadagatalið meira áberandi og gera síðuna aðgengilegri ræddar.

4. Sýni v.s. Endurmenntun

Framkvæmdastjóri Sýnis hafði samband vegna samnings MNÍ og Endurmenntunar HÍ sem skrifað var undir á dögunum og benti á að þeir hefðu nú stofnað matvælaskóla sem byði upp á námskeið. Stjórn þakkar ábendinguna og er möguleiki að samstarf verði skoðað síðar en eins og staðan er í dag verður haldið áfram að þróa samstarfið við Endurmenntun HÍ.

5. Önnur mál

Ritnefnd er að störfum. Matur- blað sem hefur komið út í tengslum við Matvæladag MNÍ kemur út með óbreyttu sniði eins og undanfarin ár en auglýsingastofan Athygli hefur séð um útgáfu blaðsins. Blaðinu verður dreift með Morgunblaðinu.

Nefndarstörf fjöreggsnefndar eru einnig í góðum farvegi.
Ákveðið var að leita tilboða í hópmatseðil á þremur veitingastöðum þar sem venja er að stjórn MNÍ bjóði undirbúningsnefnd Matvæladags, fjöreggsnefnd, ritnefnd og fyrirlesurum dagsins út að borða að kvöldi Matvæladags. Formaður tók að sér að leita tilboða.
Formaður heldur áfram uppfærslu póstlista félagsins.

6. Næsti fundur

Næsti fundur ákveðinn 8. október 2009 að Stórhöfða 23 kl 12.

Stjórnarfundur 18. ágúst 2009

Mon, 07 Sep 2009 17:09:05 GMT

Stjórnarfundur MNÍ
Dags.: 18. ágúst 2009
Staðsetning: Amokka, Borgartúni.
Fundarefni:
1. Kynning fulltrúa matvælahóps á samningaviðræðum MNÍ og Endurmenntunnar HÍ.
2. Skipting verkefna
3. Önnur mál
4. Næsti fundur
Viðstaddir eru: Herdís M. Guðjónsdóttir formaður
Sigríður Ásta Guðjónsdóttir gjaldkeri, Ragnheiður Guðjónsdóttir ritari, Guðný Jónsdóttir, Helen Grey og Balvin Valgarðsson fulltrúi matvælahóps.

Efni:

1. Kynning fulltrúa matvælahóps á samningaviðræðum MNÍ og Endurmenntunnar HÍ.
Baldvin kynnti samningaviðræður matvælahóps MNÍ við Endurmenntun HÍ (EHÍ). Gangur málsins er sá að Matvælahópur hittist til stefnumótunnar og kom þá upp sú hugmynd að ræða við Endurmenntun HÍ sem var gert og var þeim vel tekið þar. Matvælahópur hitti formann MNÍ og fékk samþykki fyrir áframhaldandi viðræðum. Þessi fundur er boðaður til að fara yfir tillögu um samning milli EHÍ og MNÍ um samstarf, hugmyndir af námskeiðum ásamt könnun sem send verður til félagsmanna í tölvupósti. Farið var yfir þessi atriði. Samningurinn milli MNÍ og EHÍ ber ekki í sér fjárhagslega skuldbindingu nema ef stórkostlegt tap verður á námskeiði. EHÍ sér um allt utanumhald og samskipti við þátttakendur. Tilnefna þarf tengiliði MNÍ vegna þess samstarfs og var ákveðið að tilnefna þrjá, einn úr hverjum hópi innan MNÍ. Stjórn samþykkir að halda verkefninu áfram.

2. Skipting verkefna.
Baldvin tekur að sér að vinna betur lista af hugmyndum af námskeiðum og setja upp könnunina sem send verður út til félagsmanna. Formaður og gjaldkeri taka að sér að uppfæra netfangalista félagsins og senda á aðra stjórnarmenn til að yfirlestrar. Markmiðið er svo að setja netfangalistann á vef MNÍ og uppfæra hann þar jafnóðum. Formaður tekur að sér að semja kynningarbréf um verkefnið til félagsmanna sem sent verður út með könnuninni.

3. Undirbúningur matvæladags.
Formaður hefur hitt undirbúningsnefnd matvæladagsins einu sinni í sumar og er góður gangur í því.

4. Næsti fundur stjórnar ákveðinn 15. september kl 12 í Sóltúni.

Stjórnarfundur 28. maí 2009

Mon, 15 Jun 2009 17:40:00 GMT

Stjórnarfundur MNÍ
Dags. 28. maí 2009
Staðsetning: Bakarameistarinn, Austurveri.
Fundarefni:
1. Kynning undirbúningsnefndar matvæladags MNÍ
2. Skipting verkefna
3. Aðildaumsóknir
4. Önnur mál
5. Næsti fundur
Viðstaddir eru: Herdís M. Guðjónsdóttir formaður
Sigríður Ásta Guðjónsdóttir gjaldkeri
Aðrir stjórnarmenn: Ragnheiður Guðjónsdóttir og Helen Grey.
Undirbúningsnefnd matvæladags MNÍ: Ólafur Reykdal formaður, Jóhanna Gunnarsdóttir, Ágúst Sigurðsson og Atli Arnarson.

Efni:

1. Ragnheiður Guðjónsdóttir settur ritari stjórnar í upphafi fundar.

2. Kynning undirbúningsnefndar matvæladags MNÍ (UMD).
Matvæladagurinn verður haldinn 18. október 2009 og var undirbúningsnefnd Matvæladagsins var mætt til að kynna efni dagsins fyrir stjórn. UMD skipa Ólafur Reykdal formaður. Jóhanna Gunnarsdóttir, Ágúst Sigurðsson og Atli Arnarson en Atli hefur tekið sæti Ingibjargar Gunnarsdóttur. Dórothea Jóhannsdóttir hættir vegna búferlaflutninga. Dóróthea hættir í UMD og kom upp sú hugmynd að Guðrún Elísabet fráfarandi formaður tæki sæti í nefndinni í hennar stað. Jóhanna ætlar að ræða við hana.

Yfirskrift Matvæladags MNÍ 2009 er: Matvælaframleiðsla og gjaldeyrissköpun. UMD kynnti drög að dagskrá Matvæladagsins (MD) ásamt efni erinda og hugmyndum um fyrirlesara. Hefðbundinn rammi verður á deginum en sú breyting var kynnt að hafa styttri og fleiri erindi en í fyrra og öll jafnlöng þannig að heildartími væri sá sami. Stefnt er að 7x20 mínútna erindi og miðað við að efni fyrstu þriggja erindanna væru greining á stöðunni í dag en síðustu fjögur myndu beina sjónum sínum að úrræðum. Farið var yfir um efnistök fyrirlestra ásamt hugmyndum um fyrirlestara en ákveða þarf fyrirlestara á næstu tveimur vikum. Undirbúningsnefndin sér um það.

Rædd var staðsetning og ákveðið að halda sig við Grand Hótel en fyrri stjórn hafði pantað þar sal. Verð: 160.000 fyrir 2 sali sem mest er hægt að koma fyrir 300 manns. Veitingar eru ekki innifaldar í þessu verði.

Áhugi fjölmiðla var ræddur og aðferðir til að vekja hann. Efnið MD hefur mun breiðari skírskotun en oft áður. Hugmyndir um að útbúa “pakka” fyrir fjölmiðla og hvort einhver sjónvarpsstöð gæti gert “kastljósþátt” um efnið.

Umsókn um styrki til ráðuneyta var rædd og ákveðið að bæði formaður MNÍ og formaður matvæladagsnefndar skrifuðu undir hana. Styrkupphæðir fyrri ára ræddar ásamt væntingum um styrki í ár.

Rætt var um þakklætisvottur fyrir fyrirlesara bæði innlenda og erlenda. Hugsanlegt að þakklætisvottur erlenda fyrirlesarans verði veglegri en áður þar sem hann tekur ekki greiðslu fyrir þar sem hann er staddur hér á landi í boði annarra samtaka.

3. Blað Matvæladags MNÍ (Matur)
Matur hefur undanfarin ár verið prentað af fyrirtækinu Athygli án kostnaðar fyrir MNÍ gegn ágóða af auglýsingum. Þetta mál er í athugun en frekar neikvæð svör hafa fengist frá því fyrirtæki þetta árið.

4. Fjöregg- viðurkenning MNÍ
Fjöreggið verður veitt sem fyrr. Kom fram sú tillaga frá UMD að beina því til fjöreggsnefndar að óskað verði eftir tillögum að verkefnum sem eru að taka inn gjaldeyri, jafnvel frumkvöðla eða eitthvað nýtt, smart og skemmtilegt. Formaður MNÍ sér um að koma þessum skilaboðum til Fjöreggsnefndar. Formaður ætlar einnig að minna fjöreggsnefnd á að kalla eftir tilnefningum.

5. Hlutverk stjórnar MNÍ og nefnda vegna Matvæladags
Hlutverk stjórnar MNÍ og nefnda sem koma að matvæladegi var rætt. Stjórn MNÍ hefur yfirstjórn yfir Undirbúningsnefnd Matvældadagsins, Fjöreggsnefnd og Ritnefnd blaðsins þó að þær hafi samskipti innbyrgðis á einhverjum stigum málsins.

Matvælanefnd yfirgaf fundinn.

6. Félagaumsóknir
Tvær aðildarumsóknir lágu fyrir fundinum. Atli Arnarsson næringarfræðingur og Elísabet Margeirsdóttir lífefnafræðingur og mastersnemi í næringarfræði sóttu um aðild. Báðar umsóknir samþykktar.

7. Félagatal og félagsgjöld
Gjaldkeri ætlar að senda formanni nýjasta félagatalið. Búið er að færa færslur hjá korthöfum Visa sem tvígreiddu félagsgjöld í fyrra. Líklega verður sami háttur hafður á hjá Eurocard. Rætt var um að senda út bréf til óvirkra félaga til að hægt sé að hafa félagatalið sem réttast þar sem fólki yrði boðið að endurnýja aðild sína að félaginu og borga árgjaldið í ár. Ákveðið að senda það í haust vegna sumarfría.

8. Heimasíða og vefpóstur.
Uppfæra þarf vefpóstlista félagsmanna og verður vefstjóri beðinn um það. Hugmynd um að senda út tölvupóst 1x í mánuði t.d. með atburðadagatalinu, minna á síðuna og nokkur orð frá stjórn um hvað er efst á baugi. Samkvæmt vefstjóra er einfalt að gera litlar kannanir á heimasíðunni. Hugmynd kom upp um að hafa teljara á síðunni. Formaður tók að sér að koma skilaboðum til vefstjóra.

9. Fræðslupistlar MNÍ í Fréttablaðinu.
Áhugi er fyrir því að halda áfram með fræðslupistla í Fréttablaðinu. Þurfum að sanka að okkur greinum í haust og fá nafn tengiliðarins á Fréttablaðinu.

10. Samþykkt
Stjórn MNÍ líst vel á tillögur UMD og samþykkir þær að sinni hálfu.

11. Næsti fundur ákveðin 28. ágúst 2009 kl. 12:00 hjá Inn-og útflutningsskrifstofu Matvælastofnunar að Stórhöfða 23 (gengið inn Grafarvogsmegin).

Aðalfundur MNÍ 2009

Fri, 22 May 2009 16:26:34 GMT

Dags:        7.maí 2009
Staður:        Grand Hótel, Háteigur B
Fundarstjóri: Bertha María Ársælsdóttir
Mættir:    28 félagsmenn
Ritari:        Ragnheiður Héðinsdóttir

Fundurinn hófst á því skipaðir voru fundarstjóri og fundarritari. Að því loknu kynntu allir fundarmenn sig með nafni, starfsheiti og vinnustað eftir því sem við átti. Síðan var gengið til dagskrár.

Dagskrá fundarins var eftirfarandi:

1.    Skýrsla stjórnar fyrir starfsárið 2008-2009

Formaður kynnti skýrslu stjórnar. Helstu efnisatriði hennar voru: Skógræktin í heiðmörk. Farin var árleg gróðursetningarferð og grillað á eftir.

Félagið var kynnt fyrir nemendum í matvæla- og næringarfræði á fundi sem kennarar HÍ stóðu fyrir síðastliðið haust og er stefnt að því að gera slíka kynningu að föstum lið.

Heilsustefna íslendinga – aðgerðaráætlun. Matvæla- og næringarfræðafélagið tók þátt undirbúningi að heilsustefnu sem unnin var síðastliðið ár á vegum heilbrigðisráðuneytis.

Málefni matvælafræðinnar. Miklar umræður áttu sér stað innan félagsins um framtíð matvælafræði sem námsgreinar og fagsviðs. Félagið átti í bréfaskiptum við HÍ vegna málsins sem hefur ekki skilað miklum árangri. Þá stóð félagið fyrir stefnumótun um matvælafræðina með góðri og málefnalegri þátttöku félagsmanna. Ýmsar hugmyndir komu fram sem flestar sneru að breyttu og bættu námi og auknu samstarfi við matvælafyrirtæki. Niðurstöður hafa verið kynntar félagsmönnum en það verður verkefni nýrrar stjórnar að vinna enn frekar úr niðurstöðunum. Matís hefur gert tillögur að nýrri námsbraut innan HÍ sem er að miklu leyti í anda þeirra athugasemda sem matvælafræðingar hafa haft um matvælafræðinámið. Kennsla samkvæmt hinni nýju námsbraut hefst í haust.

Málefni næringarfræðinnar. Á starfsárinu hafa verið skrifuð bréf til heilbrigðisráðuneytis og Heilsugæslu höfuðborgarsvæðisins að frumkvæði næringarhóps MNÍ þar sem skorað var á ráðuneytið og heilsugæsluna að ráða næringarfræðinga og eða næringarráðgjafa í sína þjónustu. Einnig var sent bréf til Tryggingastofnunar (Sjúkratrygginga Íslands) og ráðuneytis þar sem hvatt var til þess að gengið verði til samninga við næringarfræðinga og næringarráðgjafa um þá þjónustu sem þeir veita. Athugasemdum um þessi málefni hefur einnig verið komið á framfæri við heilbrigðisráðuneytið í umsögnum félagsins um lög um sjúkratryggingar og lög um heilbrigðisþjónustu. Félagið hefur einnig nú í apríl sl. skrifað bréf til styrktarsjóðs og sjúkrasjóðs BHM þar sem farið er fram á að félagið endurgreiði kostnað vegna meðferðar hjá næringarfræðingum og næringarráðgjöfum eins og annarra löggildra heilbrigðisstétta. Engin jákvæð svör hafa ennþá borist en baráttunni verður að halda áfram þar til þessi réttlætismál ná fram að ganga.

Matvæladagur MNÍ -2008 og 2009. Matvæladagur 2008 tókst afar vel og einnig var blaðið „Matur er mannsins megin“ einstaklega veglegt. Fjöreggið kom í hlut Ávaxtabílsins fyrir að auðvelda fyrirtækjum aðgang að hollum vörum. Efni Matvæladags 2009 er „Matvælaiðnaður og gjaldeyrissköpun“ og eru allar nefndir vel mannaðar. Nefndirnar vinna nú hörðum höndum að undirbúningi Matvæladagsins sem verður haldinn á Grand Hótel þann 15. október.

Ellefu greinar birtust í Fréttablaðinu á vegum félagsins undir yfirskriftinni „Matur og næring“. Þetta eru umtalsvert færri greinar en á síðasta starfsári. Bæði er um að kenna hökti í samstarfinu að hálfu Fréttablaðsins og að treglegar hefur gengið að fá greinar frá félagsmönnum. Áhugi er af hálfu stjórnar að halda blaðaskrifum áfram og Fréttablaðið er tilbúið til að birta greinarnar þegar og ef þær berast.

Skemmtinefnd félagsins stóð fyrir vínkynningu og vínsmökkun í byrjun desember, að þessu sinni hjá Ölgerðinni. Þetta tókst afar vel að vanda.

Þrír fræðslufundir voru haldnir í samvinnu við Matvælahóp Stjórnvísi. Óvíst er um áframhaldandi samstarf við Stjórnvísi þar sem ekki er ljóst hvort matvælahópurinn þar starfar áfram.

Formaður félagsins mætti á fund hjá Matvælastofnun um sænska skráargatið og gerði grein fyrir afstöðu félagsmanna til að taka það upp hér. Skiptar skoðanir eru innan MNÍ um hollustumerkingar og var reynt að koma þeim öllum á framfæri á fundinum.

Níu félagsmenn hafa gengið í félagið á árinu og tveir hafa sagt sig úr því. Þrjár umsagnir hafa verið gefnar vegna starfsleyfis næringarfræðinga.

Að lokum þakkaði formaður öllum sem lagt hafa sitt af mörkum í þágu félagsins, og félagsmönnum öllum fyrir samstarfið en hún lætur nú af formennsku eftir fjögurra ára farsælt starf í þágu félagsins.

2.    Reikningar félagsins
Sigríður Ásta Guðjónsdóttir, gjaldkeri kynnti reikninga félagsins. Fram kom að við bankahrunið lokuðust eignir félagsins í reiðubréfi inni um tíma sem kom sér afar illa þar sem þetta var á sama tíma og mestu fjárútlát ársins stóðu yfir vegna Matvæladagsins. Því var ákveðið að selja bréfin um leið og möguleiki opnaðist til þess. Nokkur afföll urðu af sölunni en á hinn bóginn höfðu peningar félagsins ávaxtast vel á undanförnum árum. Peningarnir liggja nú á opnum reikningi sem ber hæstu vexti sem eru í boði fyrir slíka reikninga.

Gjaldkeri greindi frá því að vegna mistaka hefðu gíróseðlar vegna félagsgjalda fyrir árið 2008 aldrei verið sendir út. Þeir gíróseðlar, sem nýlega voru sendir út, eru vegna félagsgjalda fyrir árið 2009. Af þessum sökum lagði stjórnin til að félagsgjöld fyrir árið 2008 yrðu felld niður. Þeir sem greiddu félagsgjöldin í gegn um kreditkortafyrirtæki fá leiðréttingu í ár.

Talsvert er af útistandandi félagsgjaldaskuldum. Því var beint til næstu stjórnar að fara yfir þau mál. Hafa þarf samband við þá sem skulda meira en tvö ár aftur í tímann og hreinsa af félagaskránni fólk sem ekki greiðir gjöldin og vill ekki vera í félaginu. Reikningar voru samþykktir samhljóða.

3.    Starfsáætlun, starfsemi faghópa, handbók MNÍ og fjárhagsáætlun
Formaður kynnti tillögur stjórnar að breytingum á starfsemi félagsins. Fyrir tveimur árum var samþykkt á aðalfundi handbók félagsins þar sem hlutverk ýmissa nefnda og hópa eru skýrð. Sumt af því sem þar kemur fram þarfnast endurskoðunar. Samkvæmt handbókinni eiga að starfa innan félagsins faghópar í annars vegar matvælafræði og hins vegar næringarfræði. Síðan þá hafa næringarrekstrarfræðingar gengið í félagið sem hópur og því er eðlilegt að bæta við faghópi þeirra. Jafnframt leggur stjórnin til að hlutverk hópanna verði skýrt betur. Lagt er til að hóparnir starfi nokkuð sjálfstætt en samt í nánu samstarfi við stjórn. Hóparnir munu m.a. annast fræðslumál, bæði innan og utan félags, hvers á sínu sviði, en lagt til að fræðslunefndin sem hingað til hefur starfað verði lögð niður. Heimasíðunefnd verður lögð niður en einum félagsmanni falið að halda heimasíðunni við. Þessar tillögur voru samþykktar samhljóða.

Á síðasta aðalfundi var stjórninni falið að gera tillögur að umbunarkerfi fyrir þá sem leggja á sig mesta vinnu í þágu félagsins. Tillaga stjórnar er að formanni og umsjónarmanni heimasíðu verði, hvorum um sig, greiddar 30.000 krónur á mánuði, í 9 mánuði á ári sem verktakagreiðslur. Það mun kosta félagið 540 þúsund á ári. Heimilt verði að fella niður félagsgjöld allra stjórnarmanna en að öðru leyti verði ekki um greiðslur til þeirra að ræða. Eins og áður hefur stjórnin heimild til að bjóða nefndum Matvæladags út að borða að loknum Matvæladegi. Þessar tillögur voru samþykktar.

4.    Ákvörðun félagsgjalda
Stjórnin lagði til að félagsgjöld yrðu hækkuð úr 4000 krónum í 5000 til að mæta kostnaði við umbun til ofangreindra og einnig má búast við að erfiðara verði að fá styrki til Matvæladagsins á næstunni. Einnig er ljóst að talsvert þarf að afskrifa af útistandandi skuldum. Nokkrar umræður urðu um þetta og fannst sumum að þar sem félagið á töluverða peninga í sjóði ætti fremur að ganga á þá en hækka félagsgjöldin. Niðurstaðan varð sú að tillagan var felld með 15 atkvæðum gegn 10 en 3 sátu hjá. Félagsgjöld verða því óbreytt.

5. Skýrslur nefnda.
i. Matvæladagsnefndir. Jóhanna Gunnarsdóttir sagði frá starfi framkvæmanefndar Matvæladags. Hún situr stíft við og hittist vikulega um þessar mundir. Komin eru drög að dagskrá en of snemmt að birta þau. Jónína Stefánsdóttir sagði frá störfum ritnefndar. Ritnefndin er búin að safna miklu af hugmyndum en á eftir að vinna úr þeim. Nokkur óvissa ríkir um útgáfu blaðsins þar sem fyrirtækið Athygli, sem séð hefur um auglýsingaöflun og umbrot, er ekki tilbúið að gera sambærilegan samning og áður vegna efnahagsástandsins. Hugsanlega þarf því að fara nýjar leiðir við útgáfu blaðsins.

ii. Pétur Helgason sagði frá störfum skemmtinefndar en hún annast skógræktarmál, vínkynningar og útivistarmál. Búið er að ákveða skógræktarferð 4. Júní, næstkomandi.

iii. Fulltrúi Íslands í EFAD er Heiða Hilmisdóttir. Samtökin fást einkum við samræmingu náms í næringarfræði og næringarrekstrarfræði. Næringarrekstrarfræðingar hafa verið duglegir að sækja stjórnarfundi þessara samtaka og hafa lært mikið á því.

iv. Anna Edda Ásgeirsdóttir er tengiliður Íslands við ICDA sem er alþjóðlegt félag næringarfræðinga og næringarráðgjafa. Félagið heldur ráðstefnur 4. hvert ár sem oft eru sóttar héðan.

v. Helga Sigurðardóttir er fulltrúi MNÍ og aðalmaður í stjórn Nordisk Dietist Förening og Kolbrún Einarsdóttir varamaður. Félagið heldur stjórnarfundi tvisvar á ári og ráðstefnu annað hvort ár. Næsta ráðstefna verður þó árið 2011 í Helsinki.

5.    Kjör til stjórnar og nefnda.
Guðrún E. Gunnarsdóttir, formaður og Ragnheiður Héðinsdóttir, varaformaður létu báðar af sínum embættum eftir fjögurra ára stjórnarsetu. Bertha María Ársælsdóttir hefur lokið einu kjörtímabili en gaf ekki kost á sér áfram. Sigríður Dröfn Jónsdóttir var kosin í fyrra til tveggja ára en hefur óskað eftir að láta af stjórnarstörfum vegna annríkis. Því þurfti að kjósa formann til tveggja ára, tvo stjórnarmenn til tveggja ára og varamann til að taka sæti Sigríðar í eitt ár, auk annars varamanns.

a. Herdís Guðjónsdóttir, matvælafræðingur, var kosin formaður til næstu tveggja ára.

b. Ragnheiður Guðjónsdóttir, næringarfræðingur og Helen Williamsdóttir Gray, næringarrekstrarfræðingur voru kosnar í stjórn til tveggja ára.

c. Guðný Jónsdóttir og Rósa Jónsdóttir voru kosnar varamenn til eins árs. Guðný tekur sæti Sigríðar Drafnar í stjórninni strax.

Pétur Helgason og Ingibjörg Gunnarsdóttir voru endurkosin skoðunarmenn reikninga.

Eftirtalin voru kjörin til að stýra faghópum félagsins:
Matvælahópur: Baldvin Valgarðsson, Ólöf Hafsteinsdóttir og Ragnheiður Héðinsdóttir
Næringarhópur: Óla Kallý Magnúsdóttir og Ragnheiður Guðjónsdóttir
Næringarrekstrarhópur: Elín Einarsdóttir, Guðný Jónsdóttir og Olga Gunnarsdóttir.

Sesselja María Sveinsdóttir var skipuð umsjónarmaður heimasíðu.

Skemmtinefnd skipa Pétur Helgason, Grímur ólafsson og Guðrún E. Gunnarsdóttir.

Í löggildingarnefnd voru kosnar Ingibjörg Gunnarsdóttir, Guðný Jónsdóttir og Ólöf Guðný Geirsdóttir

Fulltrúar í öðrum nefndum verða óbreyttir.

Engin önnur mál voru tekin fyrir.

Í lok fundar kynnti nýkjörinn formaður sig og sín störf stuttlega fyrir fundarmönnum og þakkaði traustið sem henni er sýnt með kjörinu. Fundi slitið.

Fundargerð ritaði Ragnheiður Héðinsdóttir

Stjórnarfundur 29. okt. 08

Sun, 09 Nov 2008 17:39:09 GMT

Stjórnarfundur MNÍ 2008-9

Dags.: 29. október 2008, kl. 12.00

Staður: Bakarameistarinn, Austurveri við Háaleitisbraut.

Viðstaddir: Guðrún E. Gunnarsdóttir formaður, Ragnheiður Héðinsdóttir,

Bertha M. Ársælsdóttir, Sigríður Ásta Guðjónsdóttir.

Efni:

1. Fjallað var um fjárhag félagsins. Eins og sakir standa eru peningar félagsins lokaðir í Markaðsbréfasjóði Landsbanka. SÁG mun fylgjast með gangi mála. Félagið skortir lausafé um þessar mundir en gjaldkeri mun selja markaðsbréfin um leið og sjóðirnir losna og koma fjármunum á bankabók. Sendir verða út reikningar vegna matvæladagsins en hann mun að öllum líkindum standa vel undir sér. Félagsgjöld verða einnig innheimt á næstu dögum en reynt verður að koma þeim í innheimtu á kreditkort félagsmanna.

2. Nokkur umræða var um matvælafræðina en upp kom sú hugmynd að fá matvælafræðinga félagsins í stefnumótun. Athuga með að fá sérfræðing til þess að stýra því starfi. Ráðgert að koma þessari vinnu í gang fljótlega og RH falið að tala kanna hvort Davíð Lúðvíksson væri til í að stýra kvöldfundi um þetta í síðari hluta nóvember og hvað það myndi kosta.

3. Fréttablaðsgreinar eru eitthvað af skornum skammti um þessar mundir en stungið var upp á því að endurbirta gamlar greinar sem til hjá félaginu til þess að brúa bilið.

4. Drög að aðgerðaráætlun heilbrigðisráðherra varðandi heilsustefnu hefur verið kynnt og stjórnarmenn beðnir að lesa hana yfir og koma með athugasemdir.

5. Rætt var um jólafund félagsins og hvernig hann ætti að vera. Hugmynd kom upp um að bjóða t.d. matreiðslumanni e.þ.u.l. að halda erindi eða kynningu. Spurning hvað þannig myndi kosta því félagið er ekki aflögufært um þessar mundir en alltaf yrði eitthvað þátttökugjald. Athuga með að fá Skúla Þór Magnússon til að bjóða í vínkynningu eins og áður hefur verið rætt. Ef það gengur ekki verður athugað með að fá Úlfar Finnbjörsson til að tala um jólamat.

6. Næsti fundur verður haldinn miðvikudaginn 12. nóvember kl. 12 á sama stað.

7. Fundi slitið kl. 13.15 (BMÁ).

Stjórnarfundur 21.ág. 08

Fri, 26 Sep 2008 15:04:48 GMT

Stjórnarfundur MNÍ 2007-8

Dags.: 21. ágúst 2008, kl. 12.00

Staður: Bakarameistarinn, Austurveri við Háaleitisbraut.

Viðstaddir: Guðrún E. Gunnarsdóttir formaður, Ragnheiður Héðinsdóttir,

Bertha M. Ársælsdóttir, Sigríður Ásta Guðjónsdóttir.

Efni:

1. Umsóknir um starfsleyfi. Óla Kallý Magnúsdóttir og Svandís Erna Jónsdóttir næringarfræðingar voru samþykktar.

2. Umsókn um félagsaðild: Óla Kallý Magnúsdóttir. Samþykkt.

3. MMM-matvæladagsblaðið. Leiðari frá stjórn (GEG). MNÍ-síða: umfjöllun um samstarf fræðslunefndar MNÍ og Matvælahóps Stjórnvísi m.a. (RH).

4. Fréttablaðsgreinar. Til er listi af félagsmönnum sem dugir til áramóta og RH gengur eftir því að menn skili inn greinum.

5. Vetrarstarfið. Stjórnarmenn líta það alvarlegum augum að einungis einn nemandi hafi skráð sig í BS-nám í matvælafræði 2008 en á fjórða tug nemenda hafa verið teknir inn í BS-nám í næringarfræði sem boðið er upp á í fyrsta skipti 2008. Hvorki hefur borist svar frá ráðherra né rektori sem sent var á vormánuðum um áhyggjur félagsins af þróun mála í MoN. Formaður mun hafa samband við Verk- og tæknifræðideild HR til að kanna grundvöll fyrir matvælafræðideild innan þeirra vébanda.

6. Kynningarfundur fyrir nýnema í MoN í HÍ verður haldinn 14. október og hefur stjórn verið boðið að taka þátt í þeim fundi.

7. Matvæladagur verður haldinn í Iðnó 16. október n.k. og stjórn ákvað að bjóða nýnemum frítt á fundinn.

8. Skv. handbók MNÍ eru félagsgjöld formanns, gjaldkera og ritara felld niður.

9. Á næsta fundi mun verða reynt að fara yfir heimasíðu félagsins.

10. Næsti fundur verður haldinn miðvikudaginn 17. september kl. 12 í Sýni.

11. Fundi slitið kl. 13.00. (BMÁ)